ཁྲི་སྲོང་ལྡེའུ་བཙན།
༤༥༽ དེ་ནས་ཆོས་ཀྱི་རྟེན་འབྲེལ་དུ། མཁན་སློབ་ཆོས་རྒྱལ་གསུམ་དབུ་བཞུགས་ཐོག་རབ་བྱུང་བ་བདུན་པོས་ལེགས་སྦྱར་སྐད་ཀྱིས་ལུང་འདྲེན་དང་བཅས་ཆོས་རྩོད་ཀྱི་མཆོད་པ་ཆེན་པོ་ཕུལ་བས་ཀུན་ངོ་མཚར།
༤༦༽ དེར་བཙན་པོ་རབ་ཏུ་དགྱེས་ཏེ། “ཉམས་སད་ཐེག་པའི་དགེ་འདུན་པ་མཆོག་ཤ་སྟག་བྱུང་འདུག” ཅེས་གོང་བཀུར་དང་གཟིགས་གསོལ་ཆེན་པོ་གནང་བས། སད་མི་བདུན་ཞེས་ཡོངས་སུ་གྲགས་སོ། །
༤༧༽ བཙན་པོས། ད་བོད་ལ་ཆོས་དར་བའི་རྟེན་འབྲེལ་བཟང་པོ་བྱུང་མོད། རབ་བྱུང་བ་འདི་ཙམ་གྱིས་མི་འོང༌། ད་དུང་རབ་ཏུ་འབྱུང་མཁན་ཚང་མའི་འཚོ་བ་གཞུང་ནས་རྒྱུན་གཏན་དུ་གནང་སྦྱིན་བྱ་རྒྱུ་ཞེས་བསྒྲགས།
༤༨༽ དེར་བཙུན་མོ་འབྲོ་བཟའ་ཁྲི་རྒྱལ་མང་མོ་བཙན་རབ་ཏུ་བྱུང་བའི་ཆོས་མཚན་ལ་ཇོ་མོ་བྱང་ཆུབ་སྒྲོན་ཞེས་གསོལ། དད་ལྡན་ཕོ་མོ་སུམ་བརྒྱ་ལྷག་ཅིག་རབ་ཏུ་བྱུང་བས། སངས་རྒྱས་ཀྱི་བསྟན་པ་དར་བའི་དབུ་ཚུགས།
༤༩༽ དེར་བཙན་པོས། བཙོན་པ་ཡོད་ཚད་ཀྱི་ནག་ཉེས་རྩ་ཆག་གིས་གློད་གྲོལ་བཏང༌། ཕྱིན་ཆད་ཕོ་མིག་མི་འདོན་དང༌། མོ་སྣ་མི་གཅོད་པ། ཉེས་ཅན་མི་གསོད་པ། རབ་བྱུང་བ་མཆོད་གནས་སུ་བཀུར་དགོས་པ་སོགས་ཆོས་ཁྲིམས་བཅས།
For the audio files